Tag Archive: குற்றப்புனைவு


சென்ற முறைப் பார்த்த ஹாரி ஹோலே நாவல் வரிசையில் வந்தது தான் இந்த நாவலும். யூ நெஸ்போ ஒரு கதை வொண்டர் இல்லை என்று எனக்கு நிரூபித்தது இந்த நாவலே. ஜெட் ஸ்பீடு என்றால் ஜெட் ஸ்பீடு.

1991ல் நார்வேயின் சால்வேஷன் ஆர்மி முகாமில் ஒரு 14 வயது பெண் கற்பழிக்கப்படுகிறாள். கட்டுக்கோப்பான குடும்பத்தில் வளர்ந்ததால் என்ன நடந்தது என யாரிடமும் சொல்ல முடியாமல் வளர்கிறாள். அதே நேரம் செர்பியப் போர் நடந்து கொண்டு இருக்கிறது. அங்கிருக்கும் ஒரு வீரனின் கதையும் சேர்த்து சொல்லப் படுகிறது.

பின் 2003 கிறிஸ்துமஸ் நாளிற்கு கதை வருகிறது. க்ரோட்டியாவைச் சேர்ந்த ஒரு கூலிக் கொலைகாரன் நார்வே சால்வேஷன் ஆர்மி நடத்தும் ஒரு தெரு முனை இசை நிகழ்ச்சியில் ராபர்ட் கார்ல்சன் என்பவரை சுட்டுக் கொல்கிறான். Hyperelasticity எனப்படும் ஒரு வகையான நோயில் அவதிப்படும் கொலைகாரனால் தன் முகத்தை எப்படி வேண்டுமானலும் மாற்றிக் கொள்ள முடியும். ஆனால் முடியின் நிறம், உயரம் எல்லாம் அப்படியே இருக்கும்.

இதனால் போலீஸிற்கு ஒரு தடயமும் கிடைப்பதில்லை. அடுத்த நாள் தன் பணி முடிந்து நார்வே திரும்புகையில் தான் கொலைகாரனுக்கு தான் கொன்றது குறிப்பிட்ட நபரை அல்ல அவரது தம்பியை எனத் தெரிய வருகிறது. உருவ ஒற்றுமையினால் ஏமாந்தது தெரிய வந்ததும், குடுத்த காசுக்கு கொல்லாமல் விடுவதில்லை என தன் திட்டத்தை மாற்றுகிறான் கொலைகாரன்.

ஹாரி இதை ஒருவாறு மோப்பம் பிடித்து கொலைகாரனைத் துரத்த, துவங்குகிறது ஒரு மகத்தான ஆடு புலி ஆட்டம். கடமை தவறாத போலீஸ் ஹாரி, எடுத்த காரியத்தை முடிக்கத் துடிக்கும் கொலைகாரன். ஹாரிக்கு உதவும் பேட்டே லான் மற்றும் ஹால்வர்சன். கொலைகாரனுக்கு உதவும் 14 வயதில் கற்பழிக்கப்பட்ட பெண் என ஒரு பெரிய ரோலர் கோஸ்டர் அனுபவம்.

வழக்கம் போல ஹாரி அசால்டாக பல மைல் ஓடுகிறார். புதிய பாஸிடம் சைக்கிள் பந்தயத்தில் தோற்கிறார். இருந்தும் சரியான சமயத்தில் சரியான இடத்தில் சென்று கொலைகாரனைத் துரத்திப் பிடிக்கிறார். சற்றும் எதிர்பாராத முடிவு விசிலடிக்கவே வைக்கும்.

ஸ்டீக் லார்ஸன் (தி கேர்ள் வித் டிராகன் டாட்டூ) போல் இல்லாமல், இப்படி ஒரு சால்வேஷன் ஆர்மி இருக்கும் அதுல உள்ள என்ன விஷயம் எல்லாம் நீங்களே தெரிஞ்சுக்குங்க என விட்டு சென்று விடுகிறார் யூ நெஸ்போ. இதனால் ஒவ்வொரு விஷயம் பற்றியும் பல பக்கங்களுக்கு படிக்க அவசியமில்லை. கதைக்கு எது தேவையோ, கதையை முன்னெடுத்து செல்ல என்ன விஷயங்கள் அவசியமோ அதை மட்டுமே சொல்கிறார். மக்களுக்கு விருப்பம் இருந்தால் மற்றதைப் பற்றித் தேடித் தெரிந்து கொள்ளலாம். என்ன, கொஞ்சம் தேடித் தெரிந்து கொண்டால் நால் இன்னும் ரசிக்க முடியும்.

மற்றும் ஓஸ்லோவின் அரசியல் நிலைப்பாடு, போதை மருந்துக்கு அடிமையானவர்களுக்கு அங்கு அரசாங்கம் எவ்வாறு நடத்துகிறது. இதனால் யாருக்கு, எவ்வாறு எவ்வளவு லாபம் என அறிந்து கொள்ள முடிகிறது. இங்கு தான் ஒரு புத்தகம் சினிமாவை தோற்கடிக்கிறது. என்னதான் இருந்தாலும் ஒரு சினிமாவில் நாவலில் உள்ளதைப் போல தெளிவாக சொல்ல முடியாது.

விறுவிறுப்பான நாவல் விரும்புபவர்கள் தவற விடக் கூடாத புதினம் இது.

Advertisements

 

 

குற்றப்புனைவுகளில் ஸ்கேண்டிநேவியன் நாவல்களை அடிக்க ஆள் இல்லை என்று பத்து ஆண்டுகளுக்கு ஒரு முறையாவது நிரூபணமாவது உண்டு. வாலாண்டர் தொடர்கள், அதற்கு முன் மார்ட்டின் பெக் என அவர்கள் படைத்த பாத்திரங்கள் ஏராளம். சமீபத்தில் அங்கு பிரபலமாக பேசப்பட்டுக் கொண்டிருப்பவர் யூ நெஸ்போ (Jo Nesbo). அவரது ஹாரி ஹோலே கதாபாத்திரம் மிகவும் பிரபலம். குடிப்பிரச்சினை உள்ள ஒரு போலீஸ் அதிகாரி. பல இடங்களில் டர்டி ஹாரியை நினைவுபடுத்தும் ஒரு பாத்திரம். யாருக்கும் அடங்காத, தன் உள்ளுணர்வை மட்டுமே முழுவதுமாக நம்பும் ஒரு அதிகாரி.

ஸ்நோமேன் – ஹாரி ஹோலே தொடரில் மிகவும் பிரபலமான ஒரு நாவல். தொடரில் 7வதாக வந்த இந்த நாவலே உலக அளவில் மிகவும் பெரிய பெயரைப் பெற்றுத் தந்தது. முதலில் இருந்து படித்தால் ஹாரி ஹோலே பற்றி முழுமையான ஒரு பிம்பம் உருவாகும் இருந்தாலும் இந்த நாவலைத் தனியே படித்தாலும் முன் நடந்த பல விஷயங்களை நாம் தெரிந்து கொள்ளலாம்.

நார்வேயின் ஓஸ்லோ நகரில் நடக்கும் தொடர் கொலைகளை ஆராய ஹாரி ஹோலே பணிக்கப்படுகிறார். ஒவ்வொரு முதல் பனி நாளிலும் ஒரு இளம் தாய் காணாமல் போகிறார். அவர் வீட்டு முன் அல்லது அருகில் ஒரு பனி மனிதன் செய்து வைக்கப்பட்டிருக்கிறது. பல நாட்கள் இந்த வழக்குகள் காணாமல் போனவர்கள் பர்ரியலில் இருப்பதால் அவர்கள் இறந்திருக்கலாமோ என்கிற சந்தேகத்தில் ஹாரி ஹோலே விடம் இந்த விஷயம் வருகிறது. நார்வேயின் இன்னொரு பகுதியான பெர்கென் நகரிலிருந்து ஒரு பெண் அதிகாரி ஹாரிக்கு துணையாக செயல் படுகிறார். இதை எல்லாம் தவிர ஹாரிக்கு முதல் பனி நாளில் ஒரு கொலை விழும் என்கிற மொட்டைக் கடிதமும் வருகிறது.

அது மட்டுமல்லாமம் ஹாரியின் சொந்த வாழ்க்கை ஆகக் கொடுமையாக இருக்கிறது. அவரது காதலி ரேக்கல் இன்னொருவரோடு வாழ்கிறார். ரேக்கலின் பையன் ஒலெக் ஹாரியை மட்டுமே தந்தையாகப் பார்க்கிறான். இருந்தும் ஹாரியின் வேலையும் அதைச் சார்ந்த ஆபத்துகளும் அவர்கள் சேர விடாமல் தடுக்கிறது.

அடுத்த குறி யார்?  யாரெல்லாம் இவ்வாறு கொலை செய்ய வாய்ப்பிருக்கிறது? எதற்காக கொலை செய்யப்படுகிறார்கள்? ஹாரியின் கூட இருக்கும் பெண் அதிகாரி காத்தரீன் உண்மையிலேயே உதவத் தான் வந்திருக்கிறாரா? என்பதைப் பல சுவாரசியமான பல திருப்பங்களுக்கு பின் முடிவுக்கு கொண்டு வந்திருக்கிறார் யூ நெஸ்போ.

கதாபாத்திரங்களும், அவற்றை அவர் படிப்படியாக கட்டமைப்பதும் மிகவும் சுவாரசியமாக இருக்கிறது. திருப்பம் என்றால் திருப்பம், பக்கங்களைத் திருப்பிக் கொண்டே இருக்க வேண்டியதாக இருக்கிறது. ஒரு இடத்திலும் அலுக்காத ஒரு நடை. இவராக இருக்குமோ என நினைக்கும் நேரத்தில் அவர் இல்லை என்று ஆதாரங்கள் வருவது ஹாரிக்கு எரிச்சலாக இருக்குமோ இல்லையோ நமக்கு மிகவும் கொடுமையாக இருக்கிறது.

கடைசி பகுதி போலீஸ் பார்வையிலிருந்து சடாரென கொலைகாரன் பார்வைக்கு செல்வது மிகவும் புதியது இல்லை என்றாலும் அவன் தரப்பு விளக்கம் நாவலுக்கு மிகவும் தேவையாகவும் அதே நேரம் விறுவிறுப்பாகவும் இருக்கிறது. மெல்லிய நகைச்சுவை, அபார வேகம் வெறுப்புடன் ரசிக்க வைக்கும் ஒரு கதாநாயகன். ஒரு சிறந்த குற்றப் புனைவுக்கு வேறு என்ன வேண்டும்?

முதல் இரண்டு ஹாரி ஹோலே நாவல்கள் இன்னும் ஆங்கிலத்தில் வெளிவரவில்லை. மூன்றாவது நாவலில் ரெட் பிரஸ்ட் கதையிலிருந்து துவங்கும் ஹாரி ஹோலேவின் சாகசங்கள் எந்த அமெரிக்க ஹீரோவின் சாகசத்துக்கும் குறைவில்லை. இரண்டு வாரங்களில் மூன்று ஹாரி ஹோலே புத்தகங்களை முடித்த திருப்தியில் சொல்கிறேன். நம்பி வாங்கி வாசிக்கலாம்.

நியூ ஜென் தமிழா மின் இதழில் வெளியானது.